मंचर, ता. ३ : आंबेगाव-शिरूर विधानसभा मतदारसंघात व ओमिक्रॉन रुग्णांची संख्या वाढण्याची शक्यता गृहीत धरून जिल्हा प्रशासनाने अवसरी खुर्द (ता. आंबेगाव) येथील शिवनेरी जंबो व पाबळ (ता. शिरूर) येथे उपजिल्हा रुग्णालयात तातडीने आवश्यक त्या उपाययोजना हाती घेण्यासाठी मनुष्यबळ व आवश्यक त्या निधीची तरतूद करावी, अशी सूचना गृहमंत्री दिलीप वळसे पाटील यांनी केली.
पुणे येथे सर्किट हाऊस सभागृहात सोमवारी (ता. ३) संध्याकाळी आयोजित केलेल्या बैठकीत वळसे पाटील बोलत होते. यावेळी जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद, पुणे ग्रामीण पोलीस अधीक्षक डॉ. अभिनव देशमुख, अतिरिक्त पोलीस अधिक्षक मितेश घट्टे, जिल्हा परिषदेचे उपाध्यक्ष रणजित शिवतरे, आंबेगाव शिरूर राष्ट्रवादी काँग्रेसचे अध्यक्ष मानसिंग पाचुंदकर, आंबेगाव तालुका पंचायत समितीचे सभापती संजय गवारी, उपसभापती संतोष भोर, सुभाष मोरमारे, विश्वास कोहकडे, आंबेगाव-जुन्नर विभागाचे प्रांताधिकारी सारंग कोडलकर, शिरूर-हवेलीचे प्रांत अधिकारी संजय देशमुख, आंबेगावच्या तहसीलदार रमा जोशी, वैद्यकीय अधीक्षक डॉ, अंबादास देवमाने, डॉ. सुरेश ढेकळे यांच्यासह उच्चपदस्थ अधिकारी उपस्थित होते.
जिल्हाधिकारी देशमुख म्हणाले, ‘‘प्रतिबंधात्मक औषधांचा पुरेशा प्रमाणात साठा उपलब्ध आहे. मनुष्यबळ व अन्य सुविधांसाठी निधी उपलब्ध करून देण्याचे प्रयत्नही सुरू आहे.’’ ‘‘पाबळ उपजिल्हा रुग्णालयासाठी पद मंजूर आहेत, ती ताबडतोब भरावीत. लसीकरणाचा डोस पूर्ण झाल्याशिवाय घर मालकांनी भाडेकरूंना खोल्या देऊ नयेत असा नियम प्रशासनाने करावा,’’ अशी मागणी पाचुंदकरकर यांनी केली.

अवसरी खुर्द ता आंबेगाव येथील शिवनेरी जम्बो सेंटरसाठी पाच कोटी ९७ लाख रुपये खर्च झाला आहे. ३ कोटी ८२ लाख रुपये येणे बाकी आहे. प्रलंबित देयके देण्यासाठी प्रशासनाने आवश्यक तरतुदी कराव्यात. तसेच, भविष्यकालीन तरतूदही करावी.
- दिलीप वळसे पाटील, गृहमंत्री