मंचर, ता. १३ : मंचर ते घोडेगाव रस्त्यावर निघोटवाडी (ता. आंबेगाव) येथे गतिरोधकाचा अंदाज न आल्याने मंगळवारी (ता. ११) झालेल्या मोटारसायकल अपघातात शुभांगी गणेश शेवाळे (वय ३६) या गंभीर जखमी झाल्या होत्या. पुणे येथील खासगी रुग्णालयात उपचार सुरू असताना त्यांचे गुरुवारी (ता. १३) निधन झाले. आंबेगाव तालुका शिवसेना सोशल मीडियात त्या काम करत होत्या. त्यांचा दांडगा जनसंपर्क होता. सामाजिक कार्यातही त्यांचा सक्रिय सहभाग होता. त्या घोडेगाववरून मोटरसायकलवर पती गणेश शेवाळे यांच्यासमवेत मंचरकडे येत होत्या. चौपदरीकरण रस्ता बाह्यवळणावर असलेल्या गतिरोधकाचा अंदाज न आल्याने अपघात झाला. त्यांच्यावर मंचर येथे प्राथमिक उपचार करण्यात आले. त्यानंतर पुण्याच्या खासगी हॉस्पिटलमध्ये उपचार सुरू होते. मात्र, गुरुवारी त्यांचे निधन झाले. त्यांच्या निधनामुळे लांडेवाडी गावावर शोककळा पसरली आहे.
04720