बाबा रामदेव यांची चौकशी करा
जुन्नर न्यायालयाचे पोलिसांना आदेश; कोरोनील औषधासंदर्भातील प्रकरण

जुन्नर, ता. ७ : ‘पतंजली’च्या कोरोनील या औषधाने कोरोना बरा होतो, असा दावा करणाऱ्या योगगुरु बाबा रामदेव व आचार्य बाळकृष्ण यांची पोलिस चौकशी करून अहवाल सादर करावा, असा आदेश जुन्नर न्यायालयाचे न्यायाधीश पी. व्ही. सपकाळ यांनी दिला आहे.

कायदा अभ्यासक मदन कऱ्‍हे यांनी अ‍ॅड. असीम सरोदे यांच्यामार्फत बाबा रामदेव यांच्या विरोधात न्यायालयात दावा दाखल केला आहे. कोरोना बरा करणारे औषध ‘कोरोनिल’ शोधून काढल्याचा दावा बाबा रामदेव यांनी २४ जून २०२० रोजी दिल्लीत केला होता. यामुळे नागरिकांची दिशाभूल झाली, असा आरोप करीत कुऱ्हे यांनी बाबा रामदेव आणि आचार्य बाळकृष्ण यांच्या विरोधात खासगी फौजदारी तक्रार न्यायालयात दाखल केली. या तक्रारीची न्यायालयाने दखल घेतली आहे. गेल्या ४ जानेवारी रोजी झालेल्या सुनावणीनंतर न्यायाधीश सपकाळ यांनी जुन्नर पोलिसांना या प्रकरणाचा तपास करून फौजदारी प्रक्रिया संहितेच्या कलम २०२ अन्वये ७ फेब्रुवारी २०२२ रोजी किंवा त्यापूर्वी अहवाल सादर करण्याचा आदेश दिला आहे.
 
६ जुलै २०२० रोजी दाखल झालेल्या खासगी तक्रार प्रकरणावर येथील न्यायालयात युक्तिवाद झाले. तक्रारदाराच्यावतीने युक्तिवादाची लेखी नोंदही सादर करण्यात आली. कोरोना संकटाच्या काळात असे खोटे दावे करण्यामागे भीतीच्या सावटाखाली असलेल्या नागरिकांकडून केवळ पैसा कमविण्याचा उद्देश असल्याचा आरोप तक्रार अर्जात करण्यात आला आहे.
 
अ‍ॅड. असीम सरोदे म्हणाले, ‘‘कायद्यापेक्षा श्रेष्ठ कोणीही नाही. अभिव्यक्ती स्वातंत्र्याचा तसेच कायदेशीर व्यवसाय करण्याच्या हक्कांचा प्रत्येकाने जबाबदाऱ्यांसह व वाजवी बंधनांची जाणीव ठेऊन वापर केला पाहिजे. याची मांडणी करणारा हा खालच्या स्तरावरील न्यायालयात चालणारा हा नवीन पायंडा निर्माण करणारा महत्त्वाचा खटला आहे.’’