मंचर, ता. २० : येथील क्रीडा संकुल परिसरात राज्याचे गृहमंत्री दिलीप वळसे पाटील यांच्या प्रयत्नातून मंचर पोलिस ठाण्याच्या नियोजित इमारती शेजारी आर्थिक गुन्हे शाखा, सायबर पोलिस ठाणे व जिल्हा वाहतूक शाखा उपकेंद्र इमारतीचे बांधकाम होणार आहे. त्यासाठी आठ कोटी ९६ लाख ६७ हजार ४९५ रुपये निधी खर्चाच्या अंदाज पत्रकास डिसेंबर २०२१ मध्ये प्रशासकीय मान्यता मिळाली आहे. त्यापैकी वित्तीय पूरक अनुदान म्हणून ८९ लाख ६७ हजार रुपये निधी राज्य शासनाच्या वित्त विभागाने पुणे ग्रामीण पोलिस अधीक्षक कार्यालय यांच्याकडे शुक्रवारी (ता. १८) वर्ग केला आहे, अशी माहिती भीमाशंकर कारखान्याचे अध्यक्ष बाळासाहेब बेंडे पाटील यांनी दिली.
‘‘याबाबतचे निधी वितरण आदेश गृह विभागाचे सहसचिव कैलास गायकवाड यांनी पारित केले आहेत. निविदा प्रक्रिया पूर्ण झाल्यानंतर आर्थिक गुन्हे, सायबर व वाहतूक शाखा इमारतींचे बांधकाम सुरु होईल.”असे पुणे जिल्हा परिषदेचे माजी उपाध्यक्ष विवेक वळसे पाटील यांनी सांगितले.