वाल्हे : अवकाळी पावसानंतर सध्या वातावरणात बदल झाला असून, गेल्या आठवडे भरापासून थंडीमध्ये वाढ झाली आहे. त्यामुळे वाल्हेसह आडाचीवाडी, वागदरवाडी, सुकलवाडी, पिंगोरी, दौंडज परिसरातील रब्बी हंगामातील गहू, ज्वारी, हरभरा, पावटा आदी पिकांना या पोषक वातावरणाचा फायदा होणार आहे.रब्बी पिकांची पेरणी झाल्यानंतर सुरुवातीच्या काळात पाऊस नव्हता. मात्र, पिकांची उगवण चांगली झाल्यानंतर तीन-चार दिवस जोराचा पाऊस झाल्याने पिकांची वाढीस पोषक वातावरण झाले.(Cold is beneficial for rabi crops)

दरम्यान, मागील आठवड्यापूर्वी लागोपाठ चार ते पाच दिवस ढगाळ हवामान तयार झाल्याने रब्बीतील पिकांवर रोगाचा प्रादुर्भाव होण्याची शक्यता निर्माण झाली होती. मात्र, दोन-तीन दिवसांनंतर वातावरण स्वच्छ झाल्याने पिकांवरील रोगराईचे थोडेफार संकट टळले आहे. जोमात आलेल्या रब्बी पिकांमुळे परिसरातील शिवारे हिरवाईने नटली आहेत. सध्या थंडी वाढल्यामुळे रब्बीतील सर्वच पिकांना पोषक वातावरण असल्याने पिके तरारली आहेत. काही दिवस असेच वातावरण राहिले तर रब्बी पिकांच्या उत्पन्नात नक्कीच वाढ होणार असल्याचे प्रगतशील युवा शेतकरी संभाजी पवार, प्रशांत पवार, सुशांत भुजबळ, सतीश भुजबळ, सागर भुजबळ, धनंजय पवार आदींनी सांगितले.