वालचंदनगर, ता. २ ः जमीन वाटून देत नाही, मागेल तेवढे पैसे देत नाही आदी कारणावरून आईवर मुलाने लोखंडी कोयत्याने वार करून खून केल्याची घटना इंदापूर तालुक्यातील काझडमध्ये घडली. तसेच वडिलांवर कोयत्याने वार करून त्यांना जीव मारण्याचा प्रयत्न केला. या घटनेमध्ये वडिलांच्या दोन्ही हाताची दोन बोटे तुटली आहेत. याप्रकरणी वालचंदनगर पोलिसांनी मुलावर खुनाचा गुन्हा दाखल केला आहे.

या घटनेमध्ये अलका पांडुरंग नरुटे (वय ५५, रा. काझड) या महिलेच्या डोक्यात तसेच अंगावर लोखंडी कोयत्याने सपासपा वार करून खून करण्यात आला. याप्रकरणी पोलिसांनी अमित पांडुरंग नरुटे (वय ३१, वर्षे रा. सिधोबाची वस्ती, काझड ) याच्यावर गुन्हा दाखल केला असून पांडुरंग बाबूराव नरुटे (वय ६०) यांनी वालचंदनगर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, पांडुरंग नरुटे यांची काझड परिसरामध्ये शेती व घर आहे. रविवारी (ता. २) पहाटे एकच्या सुमारास अमित याने आईला शेतामध्ये पंप सुरु करण्यासाठी जायचे असल्याचे सांगून शेतामध्ये घेऊन गेला व उसाच्या शेतामध्ये वार करून निघृण खून केला. आईला जीव मारल्यानंतर वडील पांडुरंग यांना जीव मारण्यासाठी घरी आला होता. वडिलांनाही शेतातील पाइप फुटला असून पाइप जोडण्यासाठी आपण दोघे जाऊ असे म्हणत होता. मात्र वडिलांना संशय आल्याने त्यांनी घराच्या बाहेर जाण्यास नकार दिला. यावेळी अमितने वडिलांच्या डाव्या हाताच्या दंडावर व हातावरती वार केला. यामध्ये त्यांची दोन्ही हाताची बोटे तुटली. अधिक तपास वालचंदनगर पोलिस ठाण्याचे साहय्यक पोलिस निरीक्षक बिरप्पा लातुरे करीत आहेत.