वालचंदनगर ता. ६ : काझड (ता. इंदापूर) येथील खून प्रकरणातील आरोपी अमित पांडुरंग नरुटे (वय- ३१, रा. काझड) याला इंदापूर न्यायालयाने सात दिवसाची पोलिस कोठडी सुनावली. अमित याने रविवार (ता.२) स्वत:ची आई अलका (वय ५५) यांचा कोयत्याने वार करून खून केला. तसेच वडील पांडुरंग (वय ६०) यांच्यावर कोयत्याने जीवघेणा हल्ला केला. त्यानंतर तो पसार झाला होता. वालचंदनगर पोलिसांनी त्याला बुधवार (ता. ५) रोजी सापळा रचून पुण्याजवळील खडकी रेल्वे स्थानकाच्या परिसरातून अटक केली. गुरुवारी त्याला न्यायालयात हजर केले असता न्यायालयाने त्याला बुधवारपर्यंत (ता.१२) पोलिस कोठडीत ठेवण्याचे आदेश दिले आहे. वालचंदनगर पोलिस ठाण्याचे साहायक पोलिस निरीक्षक बिरप्पा लातुरे तपास करीत आहे.
---