चाकण, ता. ३०ः येथील पोलिस उपनिरीक्षक सोमनाथ झेंडे व एका खासगी एजंटावर लाच मागून ती घेतल्याप्रकरणी गुन्हा दाखल करण्यात आला आहे. याप्रकरणी एजंट अख्तर शेखावत अली शेख (वय ३५) याला अटक करण्यात आल्याची माहिती लाचलुचपत प्रतिबंधक विभागाचे पोलिस उपअधीक्षक श्रीहरी पाटील यांनी दिली.
चाकण (ता. खेड) पोलिस ठाण्यात आलेल्या तक्रारीवरून कारवाई न करण्यासाठी पोलिस उपनिरीक्षक सोमनाथ झेंडे याने सत्तर हजार रुपये लाचेची मागणी केली होती. त्यानंतर संबंधित तक्रारदाराने याबाबत लाचलुचपत प्रतिबंधक विभागाकडे तक्रार केली. त्यानंतर आरोपी झेंडे याच्यासाठी सत्तर हजार रुपये व खासगी एजंटसाठी पंधरा हजार रुपयांची मागणी करण्यात आली. या मागणीसाठी उपनिरीक्षक झेंडे याने साहाय्य केले व आरोपी शेख याने लाचेची रक्कम स्वीकारली. लाचलुचपत प्रतिबंधक विभागाच्या पथकाने सापळा रचून शेख याला लाच घेताना पकडले. अधिक तपास पोलिस उपअधीक्षक क्रांती पवार करत आहेत. दरम्यान, पोलिस उपनिरीक्षक झेंडे याच्याबाबत अनेक लोकांच्या तक्रारी होत्या. त्याने खासगी एजंट नेमले होते. त्याची सखोल चौकशी करण्याची मागणी नागरिकांनी केली आहे.