बारामती, ता. १३ : तुझ्यामुळे जेलमध्ये राहावे लागले, जामीन मिळवायलाही खर्च झाला, त्या पोटी दोन लाख रुपये दे नाहीतर हात पाय तोडण्याची धमकी देत मारहाण केल्या प्रकरणी चौघांवर तालुका पोलिसांनी गुन्हा दाखल केला आहे.
माऊली उर्फ सूरज सोमनाथ काशीद, महेश दत्तात्रेय काशीद, गणेश दत्तात्रेय काशीद (रा. मेडद, ता. बारामती), ऋषी चव्हाण (रा. अंजनगाव, ता. बारामती) यांच्यावर गुन्हा दाखल झाला असून योगेश विजय मुलमुले (रा. क-हावागज, ता. बारामती) यांनी फिर्याद दिली.
४ जानेवारी रोजी फिर्यादीस माऊली काशीद याने विनाकारण चापट मारली. चौघांनी त्याला मारहाण केली. मागे मोरे गटासोबत झालेल्या भांडणामुळे तू जर आमच्या विरोधात केस टाकली तर तुझी विकेट काढू, तुला कोणत्या ना कोणत्या गुन्ह्यात अडकवू अशी धमकी देण्यात आली. भीतीपोटी फिर्यादीने आठ दिवस तक्रार दिली नव्हती. परंतु, पुन्हा त्यांच्याकडून त्रास होईल या भीतीने त्याने अखेर फिर्याद दाखल केली.