बारामती, ता. ५ ः येथील महावितरणचे अभियंता मनीष माधवराव दंडवते (वय ४३) यांनी राहत्या घरात गळफास घेत आत्महत्या केली. गेल्या दोन दिवसांपासून ते कामावर आले नव्हते. ऊर्जा भवन कर्मचारी वसाहतीतील आपल्या सदनिकेत त्यांनी गळफास घेतला.
शनिवारी (ता. ५) सकाळी डबेवाला त्यांना डबा देण्यासाठी आला. त्यांनी घराचा दरवाजा उघडला नाही. त्यामुळे त्याने खिडकीतून डोकावले असता त्याला किचनमध्ये नॉयलॉनच्या दोरीने गळफास घेतल्याचे निदर्शनास आले. त्यानंतर पोलिस निरिक्षक सुनील महाडीक व फौजदार गणेश पाटील यांनी घटनास्थळी जाऊन पाहणी केली, दरवाजा तोडून त्यांना खाली घेण्यात आले. मनीष दंडवते बारामतीत एकटेच राहत होते, त्यांचे कुटुंबीय सोलापूर येथे वास्तव्यास होते. त्यांच्या कुटुंबीयांना या बाबत माहिती देण्यात आली. दंडवते यांनी नेमकी आत्महत्या कशामुळे केली, हे अद्याप स्पष्ट झाले नसल्याचे पोलिसांनी सांगितले.