भोर, ता. ९ ः कोरोनाच्या वाढत्या प्रादुर्भावाच्या पार्श्‍वभूमीवर मांढरदेव (ता. वाई, जि. सातारा) येथील श्री काळूबाई देवीची (मांढरदेवीची) यात्रा रद्द करण्यात आली आहे. वाईचे प्रांताधिकारी राजेंद्रकुमार जाधव यांनी याबाबतचे आदेश जारी केले आहेत. यात्रेच्या कालावधीत केवळ मंदिराचे पुजारी आणि देवस्थान ट्रस्टचे सदस्य देवीचे धार्मिक विधी पार पाडणार आहेत.
सोमवारी १० जानेवारी ते १ फेब्रुवारीपर्यंत मांढरदेवीच्या मंदिराच्या आणि सभोवतालच्या १० किलोमीटर अंतरावरील गावांमध्ये एकत्र येऊन गर्दी करण्यास मनाई करण्यात आली आहे. या परिसरात तंबू, पाल यासारखे आडोसा असलेल्या गोष्टी उभारण्यात येणार नाहीत आणि पशुहत्याही करण्यात येणार नाही. मांढरदेव परिसरातील परखंदी, डूईचीवाडी, पिराचीवाडी, बालेघर, सुलतानपूर, लोहारे, वेरुळी, मुंगसेवाडी, सटालेवाडी, शहाबाग, अंबाडे खिंड, बोपर्डी, धावडी, धावडी फाटा, रेणूसेवस्ती, गुंडेवाडी, कोचळेवाडी, काळूबाई मंदिर जमदाडे वस्ती व सुरूर तसेच खंडाळा तालुक्यातील कर्नवडी, झगलवडी, अतीत व लिंबाचीवाडी येथील सार्वजनिक ठिकाणी किंवा रस्त्यावर मोठ्या संख्येने एकत्र येण्यास बंदी करण्यात आली आहे. याशिवाय भाविकांना भोर बाजूकडून मांढरदेवीच्या दर्शनाला देखील जाण्यास बंदी घालण्यात आली आहे. त्यामुळे भाविकांनी मांढरदेवीच्या दर्शनाला येऊ नये, असे आवाहन भोर तालुका प्रशासनाकडून करण्यात आले आहे.