आंबेठाण, ता. ३ : कोरेगाव खुर्द (ता. खेड) येथील राजूबाई वस्ती या आदिवासी ठाकर समाज बांधवांच्या वस्तीवर राजगुरुनगर येथील माऊली सेवा प्रतिष्ठान यांच्याकडून गरजूंना कपड्यांचे मोफत वाटप केले. मागील दोन महिन्यात जमा झालेल्या जवळपास २५ पोती कपड्यांचे वाटप यावेळी करण्यात आले.
राजगुरुनगर येथे लहानांपासून ते वयोवृद्ध नागरिकांपर्यंत जुने परंतु वापरण्यायोग्य असलेले कपडे माऊली सेवा प्रतिष्ठानच्या माध्यमातून गोळा करण्यात येतात. त्या कपड्यांची लहान मुले, स्री, पुरुष अशी आणि वयाप्रमाणे विभागणी केली जाते. त्यानंतर ते कपडे जिथे गरज असेल तेथे गरजू लोकांना वाटले जातात. गेल्या दोन महिन्यात जमा झालेले कपडे गरजू नागरिकांना वाटप करण्यात आले. याप्रसंगी माऊली सेवा प्रतिष्ठानचे अध्यक्ष कैलास दुधाळे, सामाजिक कार्यकर्ते हिरामण पडवळ, पंढरीनाथ पडवळ, बाबाजी कातोरे, ओंकार दुधाळे, सविता लोंढे, दिलीप राक्षे, कोरेगाव खुर्द ग्रामपंचायत सदस्या जिजाबाई मेंगळे, रंगनाथ मेंगळे, वसंत मेंगळे, दादाभाऊ मेंगळे यांनी कपडे वाटप करण्यासाठीचे नियोजन पार पाडले. ग्रामस्थांच्या वतीने ग्रामपंचायत सदस्य होनाजी मेंगळे यांनी माऊली सेवा प्रतिष्ठानचे आभार मानले.