आंबेठाण, ता. ११ : आंबेठाण (ता. खेड) येथील जिल्हा परिषद प्राथमिक शाळेतील विद्यार्थ्यांनी शिष्यवृत्तीमधील यशाची परंपरा कायम राखली आहे. शाळेतील पाचवीच्या सहा विद्यार्थी शिष्यवृत्ती जिल्हा गुणवत्ता यादीत झळकले आहेत. ही शाळा डॉ.बाबासाहेब आंबेडकर आदर्श शाळा योजनेत येते.
शाळेतील देवराज गिरी, निशा गौतम, कौस्तुभ चाबुकस्वार, रामराज गिरी, सौम्या लांडगे, प्रथमेश वराडे या विद्यार्थ्यांनी गुणवत्ता यादीत स्थान मिळविले आहे. विद्यार्थ्यांना वर्गशिक्षिका शीतल लडकत, शिक्षक मच्छिंद्र शेटे, रोहिदास येळवंडे व मुख्याध्यापक मारुती दिघे यांचे मार्गदर्शन लाभले. शाळेच्या यशाबद्दल शालेय व्यवस्थापन समितीचे अध्यक्ष सचिन मांडेकर, माजी सरपंच दत्ता मांडेकर, उपाध्यक्ष रवींद्र चव्हाण, दगडू मांडेकर, सदस्य कुलदीप पडवळ यांनी विद्यार्थी व मार्गदर्शक शिक्षकांचे अभिनंदन केले. तसेच गुरुपौर्णिमेनिमित्त शिक्षकांना सन्मानित करण्यात आले.

ग्रामविकास अधिकारी रवींद्र उगले, सरपंच, उपसरपंच, सदस्य यांचे शाळेला शिष्यवृत्तीतील यशासाठी वेळोवेळी मोलाचे सहकार्य मिळाले. तसेच माझ्या शाळेतील शिक्षक विद्यार्थ्यांना योग्य मार्गदर्शन करत असल्याने हे यश लाभले आहे.
- मारुती दिघे, जिल्हा परिषद प्राथमिक शाळा मुख्याध्यापक.