आंबेठाण, ता. ११ : चाकण औद्योगिक वसाहत टप्पा क्रमांक दोन आणि पाचमधून चाकण शहराला जोडणारा वासुली फाटा ते चाकण (प्रमुख जिल्हा मार्ग २०) हा रस्ता कंपन्यांमध्ये ये-जा करणारी अवजड वाहने वापरत असल्याने प्रचंड वाहतूक कोंडी होत आहे. यामुळे नागरिकांचा प्रवासात वेळ वाया जात आहे. याबाबत आम्ही एमआयडीसी अधिकाऱ्यांना विनंती केली होती, मात्र अधिकारी सुस्त असल्याने आम्हाला रस्त्यावर उतरण्याशिवाय पर्याय उरलेला नाही, असा इशारा माजी जिल्हा परिषद सदस्य शरद बुट्टेपाटील यांनी दिला आहे.
नागरिकांना दररोज होणाऱ्या या त्रासाबद्दल आंदोलनाची दिशा ठरविण्यासाठी शनिवारी (ता. १२) आंबेठाण येथे बैठक आयोजित करण्यात आली आहे. दररोज होणाऱ्या या प्रचंड कोंडीमुळे वासुली फाटा ते चाकण या १० किलोमीटर अंतरासाठी नागरिकांचा तीन तासांचा वेळ वाया जात आहे. तसेच शालेय विद्यार्थी, कामगार, शेतकऱ्यांचा तरकारी माल यांचे प्रचंड नुकसान होत आहे. अवजड वाहनांमुळे रस्त्यावर अपघात होत असून यात निरपराध लोक मृत्युमुखी पडल्याच्या अनेक घटनाही घडल्या आहेत.
या पार्श्‍वभूमीवर या रस्त्यावरील अवजड वाहने सकाळी ७ ते संध्याकाळी ७ बंद ठेवावी आणि चाकणचा आंबेठाण चौक, बिरदवडी, भाम फाटा, दवणेमळा फाटा, आंबेठाण गाव, कोरेगाव फाटा व वासुली फाटा येथे दिवसभरासाठी वाहतूक पोलिस कर्मचारी किंवा एमआयडीसीने सुरक्षा कर्मचारी नेमावेत, अशी मागणी या भागातील नागरिकांनी केली आहे. यासाठी बुट्टेपाटील यांच्यासह अनेक लोकप्रतिनिधी विविध मार्गाने प्रयत्न केले आहेत, परंतु एमआयडीसी प्रशासन सुस्त असल्याने आता आपल्याला या रस्त्यावरून एमआयडीसीची वाहतूक बंद करणे आणि या संदर्भात सर्वांनी एकत्र येत तीव्र आंदोलन करण्याशिवाय पर्याय नाही, असे आवाहन केले आहे.