आंबेठाण, ता. २५ : ‘‘भामा आसखेड (ता. खेड) धरण परिसरातील जलसंपदा विभागाच्या जागेचा उपयोग करून पर्यटन क्षेत्र विकासाच्या दृष्टीने अभ्यास करून प्रकल्प उभा करावा. त्यातून स्थानिकांसाठी रोजगार निर्मिती व्हावी, यासह भामा नदीवर कोरेगाव येथे नवीन बंधारा (बॅरेज) आणि पुलाच्या मागणीला जलसंपदा मंत्र्यांचे सहकार्य मिळत आहे. त्यांनी तात्काळ या दोन्ही कामांचे अहवाल मागितले आहेत.’’ अशी माहिती माजी जिल्हा परिषद सदस्य शरद बुट्टेपाटील यांनी दिली.
भामा आसखेड धरण कार्यक्षेत्रातील भामा नदीवर कोरेगाव बुद्रुक-कोरेगाव खुर्द दरम्यान असलेला कोल्हापूर पद्धतीचा बंधारा दगडी बांधकामातील असून तो अतिशय जुना झाला आहे. या बंधाऱ्यावर जड वाहतूक वाढल्याने भविष्यात यातून धोका निर्माण होऊ शकतो. पावसाळ्यात या बंधाऱ्याची भिंत देखील कोसळली होती. त्यामुळे या ठिकाणी दुहेरी वाहतुकीच्या पुलासह मोठ्या स्वरूपाचा बंधारा (बॅरेज) नव्याने बांधण्याची आवश्यकता आहे.
तसेच भामा आसखेड (ता. खेड) धरण परिसरातील जलसंपदा विभागाच्या जागेवर पर्यटन क्षेत्र विकासाच्या दृष्टीने अभ्यास करून प्रकल्प उभा करावा आणि त्यातून स्थानिकांना रोजगार उपलब्ध करून घ्यावा अशी मागणी राज्याचे जलसंपदा मंत्री राधाकृष्ण विखे पाटील यांच्याकडे केली होती.
या मागणीची नोंद घेऊन विखे पाटील यांनी महाराष्ट्र कृष्णा खोरे विकास महामंडळाचे कार्यकारी संचालक यांच्याकडून या दोन्ही मागणी संबंधीचा अहवाल मागितला आहे.
हा बंधारा आणि पूल होण्यासाठी आगामी काळात पाठपुरावा करणार असून या कामासाठी निधी मिळविणार आहे. जेणेकरून नव्याने होणाऱ्या बंधाऱ्यामुळे भविष्यातील अनेक वर्ष शेतकऱ्यांना याचा उपयोग होईल आणि दुहेरी पुलामुळे या भागातील दळणवळणासाठी याचा मोठा उपयोग होईल.