आंधळगाव, ता. २५ : राष्ट्रीय हिवताप निर्मूलनासाठी उपचाराबरोबर प्रतिबंध महत्त्वाचा आहे. त्यासाठी नागरिकांचा सहभाग महत्त्वाचा आहे. या आजाराच्या प्रतिबंधासाठी परिसर स्वच्छ राखणे आवश्यक असल्याने नागरिकांनी खबरदारी घ्यावी, असे आवाहन आरोग्य अधिकारी डॉ. नितीन फटाले यांनी केले आहे.

मांडवगण फराटा (ता. शिरूर) येथील प्राथमिक आरोग्य केंद्राच्या वतीने २५ एप्रिल हा जागतिक हिवताप दिन जनजागृतीपर व्याख्यान, प्रभातफेरी, सामूहिक किटकशास्त्रीय सर्वेक्षण आदी उपक्रमांनी साजरा केला. यावेळी फटाले बोलत होते.

वैद्यकीय अधिकारी डॉ. नितीन फटाले व आरोग्य सहाय्यक शिवाजी सांगळे यांनी हिवतापाविषयी जनजागृतीपर व्याख्यान दिले. कोरडा दिवस पाळण्याचे महत्त्व, हिवतापापासून बचावासाठी करावयाच्या उपाययोजना, आजार झाल्यास घ्यावयाची काळजी आदी विषयांवर त्यांनी मार्गदर्शन केले.

प्राथमिक आरोग्य केंद्रातील कर्मचारी, आशा स्वयंसेविका यांनी हिवताप जनजागृतीसाठी गावामध्ये फेरी काढून ‘गप्पी मासे पाळा, हिवताप टाळा’, डंक छोटा, धोका मोठा इत्यादी घोषणा दिल्या. राजेंद्र काळे, सुहास डोईफोडे, विकास करपे, शहाजी नागवे, श्रीरंग कापसे, अनिल काटाले, गटप्रवर्तक मनिषा कुदळे, धनश्री हांडे व आशा स्वयंसेविका यांनी कार्यक्रमासाठी विशेष परिश्रम घेतले.