आंधळगाव, ता. ३ : आंधळगाव-तांदळी या जिल्हा मार्गावर मोठ्या प्रमाणात काटेरी झुडपे वाढली होती. सोमवारी (ता. ८) ‘सकाळ’ ने या रस्त्यावरील काटेरी झुडपांच्या समस्येचे वृत्त ‘आंधळगाव- तांदळी रस्त्यावर काटेरी झुडपांचा अडथळा’ या मथळ्याखाली प्रसिद्ध करताच खडबडून जागे झालेल्या सार्वजनिक बांधकाम विभाग आणि ठेकेदाराने जेसीबीने काटेरी झुडपे काढली. यामुळे वाहनचालकांसह ग्रामस्थांनी ‘सकाळ’चे आभार मानले आहेत.
दीड वर्षांपूर्वी या रस्त्याच्या दुरुस्तीचे काम करण्यात आले होते. गेल्या सहा महिन्यांपासून काटेरी झुडपे रस्त्यावर येऊन ठेपली होती. याबाबत ‘सकाळ’ने वृत्त प्रसिद्ध केल्यानंतर सार्वजनिक बांधकाम विभागाच्या शिरूर उपविभागाने ठेकेदाराला काटेरी झुडपे काढण्यास भाग पाडले. आंधळगाव ते तांदळीपर्यंत काटेरी झुडपे काढली. या रस्त्यावरील वाढलेल्या काटेरी झुडपांमुळे प्रवास धोक्याचा ठरत होता. रस्त्यावर वाहनधारक जीव मुठीत घेऊन प्रवास करीत होते. काटेरी झुडपे काढल्याने रस्त्याने मोकळा श्वास घेतला आहे.

आंधळगाव-तांदळी रस्त्यावरील काटेरी झुडपे रस्त्यावर आल्याने वाहतुकीस अडथळा निर्माण झाला होता. संबंधित ठेकेदाराला आदेश दिल्याने काटेरी झुडपे काढली आहेत.
- रणजित धाईगडे, उपअभियंता, सार्वजनिक बांधकाम उपविभाग, शिरूर.

गेल्या सहा महिन्यांपासून आंधळगाव तांदळी रस्त्यावर काटेरी झुडपांमुळे मोठ्या प्रमाणात अपघात होते. ‘सकाळ’ ची बातमी प्रसिद्ध झाल्यानंतर त्वरित काटेरी झुडपे काढली. आम्ही ‘सकाळ’ चे मनापासून आभार मानतो.
- लताबाई कुसेकर, सरपंच, आंधळगाव (ता. शिरूर)