मांडवगण फराटा, ता. २५ : मांडवगण फराटा (ता. शिरूर) येथे शासनाच्या कृषी विभागाच्या वतीने हुमणी किडीचा प्रादुर्भाव रोखण्यासाठी प्रकाश सापळे लावण्याचे प्रात्यक्षिक दाखविण्यात आले. धनंजय ज्ञानदेव फराटे यांच्या शेतावर प्रशिक्षण कार्यक्रम पार पडला. यावेळी हुमणी किडीच्या एकात्मिक कीड नियंत्रणपद्धती, प्रकाश सापळा, बीजप्रक्रिया याविषयी शेतकऱ्यांना तालुका कृषी अधिकारी सुवर्णा आदक यांनी सविस्तर मार्गदर्शन केले.
‘‘हुमणीच्या प्रादुर्भावामुळे उसाच्या उगवणीत ४० टक्के तसेच प्रादुर्भाव जास्त असल्यास अगदी १०० टक्क्यांपर्यंत नुकसान होऊ शकते.पावसाळ्याच्या सुरुवातीला सूर्यास्तानंतर हुमणीचे भुंगेरे बाभळीच्या किंवा कडुनिंबाच्या झाडांवर पाने खाण्यासाठी जमा होतात. किडींना आकर्षित करण्यासाठी झाडाखाली प्रकाश सापळे गरजेचे आहेत. रॉकेल मिश्रित पाण्यात भुंगेरे पडून मरण पावतात. हे नियंत्रण उपायामध्ये सर्वात प्रभावी व कमी खर्चाचे आहे. म्हणून शेतकऱ्यांनी हुमणीच्या नियंत्रणासाठी सापळे लावावेत,’’ असे आवाहन आदक यांनी केले आहे.
तसेच शासनाच्या विविध योजना, महात्मा गांधी रोजगार हमी योजनेअंतर्गत केळी लागवड, पी.एम.एफ.एम.ई, महाडीबीटीवरील विविध योजनांची शेतकऱ्यांना माहिती आदक यांनी दिली. स्मार्टअंतर्गत उभारलेल्या व्ही.एन.एफ फार्मर प्रोड्युसर कंपनीच्या कांदाचाळ प्रकल्पास भेट दिली.
मंडळ कृषी अधिकारी अनिल पाटील यांनी बीज प्रक्रिया, बियाणे उगवण क्षमता चाचणी, रासायनिक खतांचा संतुलित वापर, सुपर केन नर्सरीविषयी माहिती दिली. याप्रसंगी कृषी पर्यवेक्षक कांतिलाल वीर, शिवाजी गोरे, पांडुरंग फराटे, मंदा फराटे, सतीश फराटे आदी उपस्थित होते. कृषी सेवक अश्विनी वंजारी यांनी कार्यक्रमाचे नियोजन केले.