मांडवगण फराटा, ता. १ : शिरूर तालुक्याच्या एका गावातील ग्रामपंचायत कार्यालयात महिला सरपंच व महिला ग्रामपंचायत सदस्यांमध्ये मासिक सभेत झालेल्या बाचाबाचीमुळे दोन गट एकमेकांत भिडले. यावरून महिला पदाधिकाऱ्यांनी दिलेल्या फिर्यादीवरून प्रतिस्पर्ध्यावर मारहाणीसह विनयभंगाचे गुन्हे दाखल केले आहेत. याप्रकरणी दोन महिला पदाधिकाऱ्यांसह पाच जणांविरुद्ध गुन्हा दाखल केला आहे. पोलिसांनी दिलेल्या माहितीनुसार, शिरूर तालुक्यातील एका गावातील ग्रामपंचायतीच्या मासिक सभेत शेतकऱ्यांना पुरविण्यात येणाऱ्या शेतीच्या अवजारांविषयी चर्चा सुरू होती. दरम्यान, चर्चा सुरू असता त्याचे पर्यावसन भांडणात झाले. यावेळी दोन्ही बाजूने गंभीर आरोप करण्यात आले, तसेच समोरासमोर एकमेकांना जोरदार मारहाण, शिवीगाळ करून धमक्या देण्यात आल्या. या प्रकरणी दोन्ही बाजूंनी एकमेकांविरोधात विविध कलमांतर्गत गुन्हे दाखल केले आहेत. या घटनेचा पुढील तपास मांडवगण फराटा पोलिस करीत आहेत.