मांडवगण फराटा, ता. ८ : वडगाव रासाई–मांडवगण फराटा रस्त्यावर पाटील मळा परिसरात उसात दबा धरून बसलेल्या बिबट्याने दुचाकीस्वारावर झडप घालून हल्ला केला.या हल्ल्यात दुचाकीस्वार जखमी झाला असून, डोक्यावर हेल्मेट असल्याने त्यांचा जीव थोडक्यात वाचला. राहुल राजेंद्र शिंदे (वय २४, मूळ रा.मलठण ता.कर्जत जि. अहिल्यानगर,सध्या रा.रांजणगाव गणपती ता. शिरूर जि.पुणे) असे जखमी तरुणाचे नाव आहे.
मिळालेल्या माहितीनुसार,राहुल शिंदे हे मूळचे अहिल्यानगर जिल्ह्यातील कर्जत तालुक्यातील मलठण येथील असून नोकरीनिमित्त ते गेल्या काही वर्षांपासून रांजणगाव गणपती येथे वास्तव्यास आहेत.बुधवारी सायंकाळी ते मांडवगण फराटा येथे नातेवाइकांना भेटण्यासाठी दुचाकीवरून आले होते. परतीच्या प्रवासात सायंकाळी साडे सहा वाजता पाटील मळा परिसरात दबा धरून बसलेल्या बिबट्याने समोरून झेप घेतली. अचानक हल्ल्यामुळे शिंदे यांची दुचाकी रस्त्यावर कोसळली.