मांडवगण फराटा, ता. २ : मांडवगण फराटा (ता. शिरूर) येथील इनामदारवस्ती येथे केवळ २०० रुपयांच्या वादातून एका युवकावर हल्ला करून त्याची आईलाही मारहाण केल्याची घटना मंगळवारी (ता. २८) दुपारी १२ वाजता घडली आहे. या प्रकरणी सुनील बाळासाहेब चव्हाण (रा. इनामदारवस्ती, मांडवगण फराटा) यांनी दिलेल्या फिर्यादीनुसार सुजल नामदेव काळे (रा. इनामदार वस्ती, मांडवगण फराटा) याच्याविरुद्ध शिरूर पोलिस ठाण्यात गुन्हा दाखल केला आहे.
पोलिसांनी दिलेल्या माहितीनुसार, फिर्यादी सुनील चव्हाण हे त्यांच्या घरी असताना आरोपी काळे याने त्यांच्या घरासमोर येत कामाचे २०० रुपये दे, अशी मागणी केली. त्यावर फिर्यादींनी ते पैसे निखिल जामरेकडे आहेत, असे सांगितले असता आरोपी संतप्त झाला. त्याने माझे पैसे तूच दे, असे म्हणत हाताने व लाथाबुक्यांनी चव्हाण यांच्यावर हल्ला केला. दरम्यान, भांडण सोडवण्यासाठी आलेल्या फिर्यादीच्या आईलाही आरोपीने मारहाण करून त्यांच्या डाव्या हाताला दुखापत केली. पुढील तपास पोलिस हवालदार उबाळे करत आहेत.