मांडवगण फराटा : मांडवगण फराटा (ता.शिरूर)येथील इनामदार वस्ती परिसरात सोमवारी (ता.१९) पहाटे सुमारे पाच वाजण्याच्या सुमारास बिबट्याने अमोल आबासाहेब काशीद यांच्या गोठ्यातील कालवडीवर बिबट्याने हल्ला करून तिला ठार केले. याच वेळी हनुमंत काशीद यांच्या पत्नी सोनाली काशीद या पहाटे घराबाहेर आल्या असता, दबा धरून बसलेल्या बिबट्याने त्यांच्यावर झडप घालण्याचा प्रयत्न केला; मात्र त्यांनी प्रसंगावधान राखत तातडीने घरात धाव घेत दरवाजा बंद केला. त्यामुळे सुदैवाने त्या मोठ्या अनर्थातून बचावल्या. दरम्यान, सुमारे १० दिवसांपूर्वी याच परिसरातील अरविंद फराटे यांच्या वस्तीवर वनविभागाने एक बिबट्या जेरबंद केला होता. दरम्यान घटनेची माहिती मिळताच वनविभागाच्या अधिकाऱ्यांनी घटनास्थळी भेट देऊन पंचनामा केला असून लवकरच परिसरात पिंजरा लावण्यात येईल, असे आश्वासन दिले आहे.वारंवार होणाऱ्या बिबट्याच्या हल्ल्यांमुळे ग्रामस्थांनी वनविभागाकडे तातडीच्या उपाययोजना करण्याची मागणी केली आहे.