मांडवगण फराटा,ता.२८ : गणेगाव दुमाला (ता. शिरूर) येथील म्हसोबावाडी जिल्हा परिषद शाळेच्या जागेवर अतिक्रमण करून शाळेच्या मालमत्तेचे नुकसान केल्याप्रकरणी चार जणांविरुद्ध शिरूर पोलिस ठाण्यात गुन्हा दाखल करण्यात आला आहे.शाळेच्या तार कंपाउंडचे काम जबरदस्तीने बंद पाडणे, बोअरवेलच्या मोटारीची वायर व पाइप तोडणे तसेच विद्यार्थ्यांच्या येण्या-जाण्याच्या मार्गात अडथळा निर्माण केल्याचा गंभीर आरोप आहे. या प्रकरणी शाळेचे शिक्षक भागवत हरिभाऊ शेंडकर (रा.काष्टी ता.श्रीगोंदा,जि. अहिल्यानगर) यांनी शुक्रवारी (ता.२७ फेब्रुवारी) शिरूर ठाण्यात फिर्याद दिली आहे.त्यानुसार सदाशिव बाबूराव भोसले, ताराबाई सदाशिव भोसले, महेंद्र सदाशिव भोसले व सचिन सदाशिव भोसले (सर्व रा. म्हसोबावाडी,गणेगाव दुमाला,ता.शिरूर) यांच्याविरुद्ध गुन्हा नोंदविण्यात आला आहे. पुढील तपास प्रभारी अधिकारी पोलीस निरीक्षक संदेश केंजळे यांच्या मार्गदर्शनाखाली पोलीस हवालदार शिंदे करीत आहेत.