आळंदी, ता.१ : कीर्तनासाठी बाहेरगावी गेलेल्या महाराजांच्या आळंदी (ता. खेड) येथील घरी चोराने कडी कोयंडा तोडून कागदपत्रे आणि पैशांवर डल्ला मारला. आळंदीतील वारकरी विद्यार्थ्यांना सांप्रदायिक शिक्षण देणाऱ्या सदगुरू जोग महाराज वारकरी शिक्षण संस्थेची महत्त्वाची कागदपत्रे आणि साडे सत्तेचाळीस हजार रुपयांची रोख रोकड चोरी झाल्याबाबत आळंदी पोलिस ठाण्यात गुन्हा नोंदविण्यात आला आहे.
चोरीची घटना मंगळवारी (ता.२५) रात्री ते बुधवारी (ता.२६) पहाटेच्या दरम्यान संतोष महाराज सुंबे (रा. घुंडरे गल्ली, आळंदी देवाची)
यांच्या घरी घडली. याबाबत फिर्याद त्यांनी आळंदी पोलिस ठाण्यात दिली. सुंबे हे कीर्तनकार असून सदगुरू जोग महाराज वारकरी शिक्षण संस्थेचे दैनंदिन शासकीय निमशासकीय, मंत्रालयातील कामकाज तसेच धर्मदाय आयुक्त कार्यालयातील कामकाजाबाबत संस्थेस मदत करत आहे. यामुळे संस्थेचे न्यायालयीन कामकाजाची महत्त्वपूर्ण मूळ कागदपत्रे ते स्वतःच्या मालकीच्या घरी ठेवत असत. सुंबे हे बुधवारी (ता.२६) खामगावहून प्रवासात परत आळंदीला येत असताना त्यांच्या घरातील अन्य इसमाने चोरी झाल्याबाबत कल्पना दिली. यामध्ये अज्ञात सुंबे यांच्या घराच्या दरवाजाचा कडी कोयंडा चोरट्याने तोडला. घरातील कपाटातील कागदपत्रे तसेच अन्य विद्यार्थ्यांच्या पत्र्याच्या पेट्याही चोरून नेल्या. सोबत साडे सत्तेचाळीस हजार रुपयांची रोकड चोरट्यांनी लांबवली. याबाबत अधिक तपास आळंदी पोलिस करत आहेत.