आळंदी, ता. २७ : प्रेयसीसोबत दुसरा संसार थाटण्याच्या उद्देशाने पत्नीला मारहाण करत हातपाय दोरीने बांधले व चाकूने गळ्यावर वार करत जिवे मारण्याचा प्रयत्न केल्याप्रकरणी आळंदी पोलिस ठाण्यात पती आणि तिच्या प्रेयसीवर गुन्हा दाखल केल्याची माहिती वरिष्ठ पोलिस निरिक्षक सुनील गोडसे यांनी दिली.
याबाबत समीर लतीफ पठाण (रा. टाकळी मियाँ, राहुरी, जि. नगर) आणि लातुर जिल्ह्यातील पण सध्या दिघी (ता. हवेली) येथे राहणाऱ्‍या त्याच्या प्रेयसीवर गुन्हा दाखल केला आहे. ही घटना मंगळवारी (ता. २५)चिंबळी येथील बनकरवस्ती येथे घडली.
आरोपीने एक पत्नी असताना दुसरीसोबत संसार थाटण्याचा प्रयत्न केला. आरोपी कर्ज प्रकरण करण्याचे काम करत होता. यातूनच दोघांची ओळख झाली आणि प्रेमात रूपांतर झाले. एकत्र राहण्यासाठी त्यांनी फिर्यादीस जिवे मारण्याचा प्रयत्न केला. याप्रकरणी अधिक तपास आळंदी पोलिस करत आहे.