आळंदी, ता. २६ : नामवंत कीर्तनकाराचे कीर्तन आणि दोन हजार भाविकांच्या उपस्थितीत संत श्री ज्ञानेश्वर महाराजांचा सप्तशतकोत्तर सुवर्णमहोत्सवी अवतरण सोहळा मोठ्या उत्साहात पार पडला.
वारकरी संप्रदायाची पायाभरणी मुहूर्त करणारे संत ज्ञानेश्वर महाराज यांच्या अवतरणाला येत्या गोकुळाष्टमीला साडेसातशे वर्ष पूर्ण होत आहेत. या पर्वकाळाच्या निमित्ताने ज्ञानेश्वर महाराजांच्या समग्र ग्रंथांचे पारायण व्हावे, त्यांच्या समग्र चरित्राचे यथार्थ चिंतन समाजापर्यंत जावे, या हेतूने आळंदीतील साधकाश्रम येथे १० मे ते २४ मे या कालावधीत हा अखंड हरिनाम सप्ताह आयोजित करण्यात आला होता.
आळंदीतील साधकाश्रमाचे संस्थापक दादा महाराज साखरे यांच्या ८५ व्या पुण्यस्मरणाचे औचित्य आणि ज्ञानेश्वर महाराजांच्या सुवर्ण महोत्सवी अवतरण वर्षाचे औचित्य साधून हा सप्ताह आयोजित केला. या सप्ताहाचे वैशिष्ट्य म्हणजे ज्ञानेश्वरी ग्रंथाचे १०८ पारायण केलेले साडेतीनशे वाचक या सोहळ्यामध्ये उपस्थित होते. तसेच एकूण अडीच हजार वाचक ज्ञानेश्वरी पारायणास उपस्थित होते.

यावेळी पांडुरंग महाराज घुले, नंदराज महाराज सिद्धरस, चैतन्य महाराज देहूकर, योगीराज महाराज गोसावी, धारकरी संभाजी भिडे यांनी सप्ताहास भेट दिली. नुकतेच पद्मश्री पुरस्काराने सन्मानित झालेले गणेश्वरशास्त्री द्रविड तसेच माजी सनदी अधिकारी अविनाश धर्माधिकारी यांनी या हरिनाम सप्ताहास भेट दिली.
दरम्यान सप्ताहाच्या सुरुवातीला वारकरीध्वजा पूजनासाठी अयोध्येतील श्रीराममंदिर ट्रस्टचे कोषाध्यक्ष गोविंददेवगिरी यांचीही उपस्थिती लाभली. या सप्ताहात चिदंबरेश्वर महाराज साखरे यांच्या वाणीतून श्रोत्यांना संत ज्ञानेश्वर महाराजांच्या चरित्राचे समास्वादन करावयास मिळाले. सप्ताहामध्ये बबन महाराज मस्के, जयंत महाराज गोसावी, पंडित महाराज क्षीरसागर, ज्ञानेश्वर माऊली शिंदे, चिदंबर महाराज साखरे, यशोधन महाराज साखरे या कीर्तनकारांची कीर्तने झाली.