आळंदी, ता. १३ : संत ज्ञानेश्‍वर महाराज जन्मोत्सव सप्तशतकोत्तर सुवर्ण महोत्सवी वर्षानिमित्त इंद्रायणी काठी जागतिक सहिष्णुता सप्ताह मंगळवार(ता. १७) पासून सुरू होत आहे. या निमित्ताने आषाढ वारी सोहळ्यासाठी आलेल्या भाविकांना नामवंत कीर्तनकार गायकांचे कार्यक्रम अनुभवता येणार आहेत.
हा जागतिक सहिष्णुता सप्ताह विश्‍वशांती केंद्र माईर्स एमआयटी आणि आळंदी देहू परिसर विकास समितीच्या वतीने मंगळवार (ता. १७) ते गुरुवार (ता. १९) या काळात होणार आहे. या सहिष्णुता सप्ताहाचे उद्‍घाटन मंगळवारी सायंकाळी सव्वा पाच ते सहा या दरम्यान विश्‍वशांती केंद्र माईर्स एमआयटीचे संस्थापक अध्यक्ष डॉक्टर विश्‍वनाथ कराड, डॉ. विजय भटकर, मंगेश कराड, सुनील कराड, राहुल कराड, स्वाती चाटे यांच्या उपस्थितीत होईल.
यामध्ये सकाळी साडेनऊ ते साडेअकरा ज्ञानेश्‍वर करंजीकर, जयेश भाग्यवंत, पोपट कासारखेडकर यांचे कीर्तन होणार आहे. दुपारी दोन ते साडेचार अनिरुद्ध कारकर, अभिमन्यू पांचाळ, श्रेयस बडवे आणि त्यांच्या मित्र परिवाराच्या वतीने अभंग वाणी तसेच गवळणीचा वारकरी सांप्रदायिक पद्धतीने कार्यक्रम होणार आहे. सायंकाळी सव्वा पाच ते सव्वा सहा उद्धव मंडलिक, तुकाराम दैठणकर यांचे प्रवचन होईल. संध्याकाळी सात ते रात्री नऊ जगन्नाथ पाटील, भगवती दांडेकर, चिदंबरेश्‍वर साखरे यांचे कीर्तन होईल. रात्री सव्वा नऊ ते साडे अकरा ज्ञानेश्‍वरी घाडगे, आसावरी बोधनकर, रघुनाथ खंडाळकर यांच्या संतवाणी, भक्ती संगीताचा कार्यक्रम होईल. दरम्यान दररोज काकडा आरती हरिपाठ होईल. भजन आणि टाळ मृदंगाची साथ संगत एमआयटी हनुमान भजनी मंडळ विश्‍वदर्शन देवता भजनी मंडळ विश्‍वशांती दिंडी भजनी मंडळ करतील.