आळंदी, ता. १५ : मादी बिबट्या, दोन पिल्ले आणि तरसाचे दर्शन शनिवारी (ता. १४) दिवसभरात आळंदीकरांना झाले. अनेकांनी बिबट्याला उसाच्या शेतात जाताना पाहिल्यामुळे नागरिकांमध्ये घबराट निर्माण झाल्याचे चित्र आहे. याबाबत चर्चा वाढत गेल्याने आळंदी-चऱ्होली रस्त्यावरील स्वामी समर्थ मंदिरामागे बिबट्याच्या मागावर वनविभागाचे कर्मचारी आणि स्थानिक नागरिकांनी रात्री उशिरा धाव घेतली.
त्यांना त्या ठिकाणी बिबट्या आणि तरसाच्या पंजाचे ठसे आढळले असल्याचा दुजोरा वनविभागाच्या कर्मचाऱ्यांनी दिला. त्यामुळे नागरिकांनी अधिक सतर्क राहण्याची आवश्यकता बनली आहे. याबाबत माहिती देताना प्रसाद बोराटे आणि संजय चव्हाण यांनी सांगितले की, ‘‘आळंदीतील शेतकरी विशाल थोरवे यांच्या शेतामध्ये बिबट्या आणि दोन पिल्ले नागरिकांनी पाहिली, तर एकाने बिबट्याला झाडावर चढताना पाहिले.’’ यापूर्वीही अनेकदा बिबट्या आळंदीसारख्या शहरी भागाजवळ वावरत असल्याचे चित्र होते. मात्र, ऐन वारीकाळात शहराच्या वर्दळीच्या ठिकाणी बिबट्याचा वावर आढळल्याने काहीसे भीतीयुक्त चित्र नागरिकांमध्ये पाहायला मिळाले. बोराटे यांनी वनविभागाच्या कर्मचाऱ्यांना याबाबत माहिती दिली असता रात्री कर्मचारी त्या ठिकाणी गेले. नवनाथ पगडे या कर्मचाऱ्याला बिबट्या आणि तरसाच्या पंजाचे ठसे आढळले. दरम्यान, त्यांनी नागरिकांना मार्गदर्शन करत ‘घाबरू नका’ असे सांगितले. माजी नगराध्यक्ष सचिन पाचुंदे, महेश कुऱ्हाडे, विशाल थोरवे आदींनी बिबट्याचा शोध घेण्याचा प्रयत्न केला.