आळंदी, ता. २४ : चऱ्होली बुद्रुक आणि चऱ्होली खुर्द (ता. खेड) या दोन गावांना जोडणारा आळंदी बाह्यवळण रस्ता खड्ड्यामुळे धोकादायक बनला आहे. पुलावर मोठा खड्डा पडल्याने लोखंडी सळई उघड्या अवस्थेत दिसत आहेत. पावसाळ्यात या ठिकाणी अपघात होण्याची शक्यता वाढली आहे.
या पार्श्वभूमीवर उपमुख्यमंत्री अजितदादा पवार यांच्याकडे तातडीने रस्ता दुरुस्तीबाबत कारवाईची मागणी केली आहे. शिवसेना उद्धव बाळासाहेब ठाकरे पक्षाचे पिंपरी चिंचवड उपशहरप्रमुख ॲड. कुणाल तापकीर यांनी दिलेल्या निवेदनात म्हटले की, रस्त्यावर दोन किमीपर्यंत खड्डे, धूळ, कचऱ्याचे ढीग आणि पुलावर सुरक्षेच्या कोणत्याही सोयी नसल्यामुळे नागरिकांच्या जीवितास धोका निर्माण झाला आहे. अनेक नागरिक येथे मासेमारीसाठी थांबतात आणि अस्वच्छतेला कारणीभूत ठरतात. पूल आणि रस्त्याची तातडीने दुरुस्ती करावी. पुलावर सुरक्षा जाळी बसवावी आणि नियमित स्वच्छता करावी. संपूर्ण रस्त्यावरील खड्डे बुजवून प्रवास सुरक्षित करावा. या गंभीर विषयाकडे उपमुख्यमंत्री अजित पवार यांनी लक्ष घालून चऱ्होली आळंदी ग्रामस्थांना न्याय मिळवून द्यावा, अशी विनंती केली आहे. यावेळी युवासेना आळंदी शहर प्रमुख मनोज पवार उपस्थित होते.