आळंदी, ता. ३० : सरदार वल्लभभाई पटेल यांच्या १५० व्या जयंतीनिमित्त राष्ट्रीय एकात्मता दिनाचे औचित्य साधून आळंदी पोलिस ठाण्यातर्फे ‘रन फॉर युनिटी’ या उपक्रमाचे आयोजन आज (ता. ३१) करण्यात आले आहे. या उपक्रमाच्या माध्यमातून राष्ट्रीय एकात्मतेचा संदेश जनतेला देऊन सरदार वल्लभभाई पटेल यांच्या एकजुटीच्या विचारांना अभिवादन करण्यात येणार आहे. यावेळी धावण्याची सुरुवात ज्ञानेश्वर विद्यालयातून होणार असून घुंडरे आळी, प्रदक्षिणा रोड, नवीन पूल, देहू फाटा चौक, चाकण चौक ते ज्ञानेश्वर विद्यालय असा तिचा मार्ग असेल. या उपक्रमात आळंदी पोलिस ठाण्यासोबतच पंचक्रोशीतील सर्व शाळा, विद्यालय, महाविद्यालय, खेळाडू, सेवाभावी संस्था, गणेश मंडळे, ज्येष्ठ नागरिक संघ, शांतता कमिटी, पोलिस मित्र सहभागी होणार आहेत. आळंदीतील व्यापारी, कामगार व नागरिकांनी यामध्ये मोठ्या संख्येने सहभाग नोंदवावा, असे आवाहन आळंदी पोलिस ठाणे व ज्ञानेश्वर विद्यालयाच्या वतीने करण्यात आले आहे.