आळंदी, ता. १० : आळंदी परिसरातील गावामध्ये बिबट्याच्या वावर गेल्या दोन वर्षांपासून कायम आहे. चऱ्होली खुर्दमधील एका उसाच्या शेतामध्ये बिबट्याने शेळीवर हल्ला करत तिची शिकार केली.
ही घटना एका मंगल कार्यालय मागे बुधवारी (ता. १०) दुपारी साडेतीनच्या सुमारास घडली. मृत शेळीची अवस्था पाहून स्थानिक शेतकऱ्याने वन विभागात माहिती दिली. त्यांनतर वन विभागातील आंचल गवळी यांना संपर्क केला. त्यांनी घटनेचा माहिती घेतली व पंचनामा केला. यावेळी उपसरपंच रवी कुऱ्हाडे, राजाराम थोरवे, रवी थोरवे, आनंद थोरवे, निवृत्ती थोरवे, मछिंद्र थोरवे, पांडुरंग केवळ, काळुराम थोरवे यांच्यासह स्थानिक शेतकरी आणि महिला घटनास्थळी आले. दरम्यान, पांडुरंग केवळ हे ठाकर समाजाचे असून, त्यांची आर्थिक परिस्थिती गरीब आहे. त्यामुळे तातडीने मदत मिळावी, अशी मागणी स्थानिक शेतकऱ्यांनी केली.
दरम्यान आळंदी परिसरातील चऱ्होली खुर्द, वडगांव घेणंद, केळगाव, धानोरे, मरकळ, चऱ्होली बुद्रुक या भागात बिबट्याचा वावर वाढला आहे. यापूर्वीही केळगावमध्ये बिबट्याने मेंढपाळाच्या मेंढ्या खाल्ल्या होत्या. आळंदी नगर परिषद हद्दीत बिबट्या पिल्लासह ठाणे मांडून आहे. पिंपरी चिंचवड हद्दीत चऱ्होली बुद्रुक हद्दीतही बिबट्या आला आहे. गेली काही महिने मुक्काम केल्याप्रमाणे राहत आहे.
आळंदी परिसरात बिबट्याचा वावर वाढल्याने आळंदी, केळगाव, चऱ्होली खुर्द आणि बुद्रुक दोन्ही भागात मॉर्निंग वॉक बंद झाले. अनेकांनी फिरण्याची वेळ बदलली.