बिबवेवाडी येथील राजयोग सोसायटी रोडवर असलेल्या दिग्विजय अपार्टमेंट, गृहकल्पा को-ऑप. हौसिंग सोसायटी येथे एका फ्लॅटमध्ये कुलूप तोडून घरफोडीची घटना घडल्याने परिसरात दहशतीचे वातावरण पसरले आहे. ही घटना ५ फेब्रुवारी रोजी पहाटे अंदाजे २ ते ४ वाजण्याच्या सुमारास घडली.

मिळालेल्या माहितीनुसार, रात्रीच्या वेळेत जोरात दुचाकी जात असल्याचा आवाज ऐकू आला होता. त्यानंतर चोरट्यांनी संबंधित फ्लॅटमधील कपाट फोडले, मात्र त्यांना कोणतीही मौल्यवान वस्तू हाती लागली नाही. सुदैवाने या घटनेत कोणतीही जीवितहानी झाली नाही.

विशेष म्हणजे, या सोसायटीमध्ये सीसीटीव्ही कॅमेरे तसेच सुरक्षा रक्षक उपलब्ध नाहीत, त्यामुळे चोरट्यांना घरफोडी करण्यास वाव मिळाल्याची चर्चा नागरिकांमध्ये होत आहे. सोसायटीत अनेक ज्येष्ठ नागरिक वास्तव्यास असल्याने त्यांच्या सुरक्षिततेबाबत गंभीर प्रश्न निर्माण झाले आहेत.

या घटनेची माहिती बिबवेवाडी पोलीस ठाण्यात देण्यात आली असून नागरिकांनी अधिक सतर्क राहावे तसेच कोणतीही संशयास्पद हालचाल किंवा घटना दिसल्यास तात्काळ ११२ या क्रमांकावर संपर्क साधावा, असे आवाहन पोलिसांनी केले आहे..