आळंदी, ता. २६ : येथील जिल्हा परिषद प्राथमिक शाळेतील ५५ विद्यार्थ्यांनी राष्ट्रीय आर्थिक दुर्बल घटक (एनएमएमएस) शिष्यवृत्ती परीक्षेत गुणवत्ता यादीत स्थान पटकावले. या यशस्वी विद्यार्थ्यांना चार वर्षांत एकूण २६ लाख ४० हजार रुपयांची शिष्यवृत्ती मिळणार असून, शाळेचा निकाल ९८ टक्के लागला आहे. शाळेतील ८६ पैकी ८४ विद्यार्थी या परीक्षेत उत्तीर्ण झाले. यामध्ये इयत्ता आठवी ‘क’ मधील ४८ पैकी ४७ विद्यार्थ्यांनी गुणवत्ता यादीत स्थान मिळवले. त्यांना अनिता परदेशी यांनी मार्गदर्शन केले होते. तर, आठवी ‘ब’ मधील ८ विद्यार्थ्यांनी मुकुंद गावडे यांच्या मार्गदर्शनाखाली यश संपादन केले. मुख्याध्यापक सत्यवान लोखंडे यांचे नियोजन व मार्गदर्शन महत्त्वाचे ठरले. या यशाबद्दल शिक्षक, पालक आणि ग्रामस्थांकडून विद्यार्थ्यांचे कौतुक होत आहे.