आळेफाटा, ता. १० : आळे येथील यात्रा शांततेत पार पडण्यासाठी सर्व ग्रामस्थांनी सहकार्य करावे असे आवाहन आळेफाटा पोलिस ठाण्याचे निरीक्षक यशवंत नलावडे यांनी केले आहे.
आळे (ता. जुन्नर) येथील श्री ज्ञानेश्वर महाराजांनी वेद बोलविलेला रेडा समाधी यात्रा महोत्सव शनिवार (ता. १५) पासून सुरू होत असल्याने येथील मंदिर परिसराची पाहणी पोलिस निरीक्षक नलावडे यांनी केल्यानंतर उपस्थित यात्रा कमिटी व ग्रामस्थांना माहिती देताना ते बोलत होते. याप्रसंगी श्री ज्ञानेश्वर महाराज देवस्थान ट्रस्टचे अध्यक्ष धनंजय काळे, एकनाथ कुऱ्हाडे, जीवन शिंदे, संतवाड गावचे सरपंच नवनाथ निमसे, संजय शिंदे, अविनाश कुऱ्हाडे, म्हतुजी सहाणे, कान्हू पाटील कुऱ्हाडे, चारूदत्त साबळे, विलास शिरतर, संतोष पाडेकर, गिरीश कोकणे, ॲड. सुदर्शन भुजबळ, संजय खंडागळे, महेंद्र गुंजाळ, बाळशिराम डावखर, गोरक्षनाथ दिघे, ज्ञानदेव सहाणे, बाजीराव निमसे, प्रसन्न डोके, महेंद्र पाडेकर, माधव टकले, राजू पाडेकर, सुहास पाडेकर उपस्थित होते.
पुणे जिल्ह्यातील ग्रामीण भागातील ही सर्वात मोठी यात्रा असून ती चार दिवस चालते. भजन महोत्सव, पालखी सोहळा, हरी कीर्तन, भंडारा,कुस्त्यांचा आखाडा अशा कार्यक्रमांचे आयोजन करण्यात आले आहे.
नलावडे म्हणाले, ‘‘यात्रा कमिटीने पार्किंगसाठी मंदिरापासून ५०० मीटर पुढील क्षेत्रात जागा उपलब्ध करून द्यावी. तसेच मंदिर परिसराचा संपूर्ण परिसर सीसीटीव्ही कव्हरेजखाली घेण्यात यावा.’’