आळेफाटा, ता.२१ : राजुरी (ता.जुन्नर) येथील फावडे मळा येथील विलास येधू औटी यांनी केवळ वीस गुंठ्यात आधुनिक पद्धतीने भेंडीचे पीक फुलविले.
पाणी व्यवस्थापन, जैविक खतांच्या जोरावर केवळ दीड महिन्यात एक टन मालाचे उत्पादन मिळविले आहे. सध्या पिकास ३० रुपये प्रतिकिलो बाजारभाव मिळत असल्याने येत्या दोन महिन्यात सुमारे दीड ते दोन लाख रुपयांचा निव्वळ नफा मिळण्याचा विश्‍वास त्यांनी व्यक्त केला आहे.

औटी यांनी''विकेल ते पिकेल'' हे उद्दिष्ट डोळ्यासमोर ठेऊन भेंडीच्या ''सिंटिझा'' या वाणाची निवड केली. जास्त उत्पादन मिळविण्यासाठी तसेच लागवडीकरिता योग्य नियोजन केले. रोपांची सर्वतोपरी काळजी घेतली. सुरुवातीला ट्रॅक्टरद्वारे जमीन रोटारली. सरी काढून सव्वा किलोचे बियाणे एक फुटाच्या अंतरावर लावले. यामुळे रोपांची चांगली वाढ झाली व लवकर उत्पादन मिळण्यास सुरुवात झाली.

योग काळजी घेतल्यामुळे दीड महिन्यातच भेंडी तोडण्या योग्य झाली. ऑगस्टच्या दुसऱ्याच आठवड्यात एक टन माल मिळाला. त्याच्या विक्रीतून २० हजार रुपयांचा उत्पादन खर्च वसूल होऊन चांगला नफा मिळविला. दरम्यान, यामधून सुमारे चार टन मालाचे उत्पादन मिळणार आहे. सध्या मिळत असलेल्या प्रतिकिलो ३० रुपयांचा बाजारभाव कायम राहिल्यास पुढील दोन महिन्यांत सव्वा ते दीड लाख रुपयांचा निव्वळ नफा मिळणार आहे.
दरम्यान, औटी यांच्या पत्नी संगीता व किरण पखाले यांचे भेंडी पिकाचे उत्पादन घेण्यासाठी मोलाचे सहकार्य लाभत आहे.

भेंडी पिकाच्या उत्पादनासाठी रासायनिक खतांचा व औषधांचा वापर न करता सुरुवातीला शेण व जैविक खतांचा वापर केला. यामुळे पीक चांगले बहरले व
लवकरच तोड्याला आली. लुसलुसीत भेंडी असल्यामुळे व्यापाऱ्याने बांधावर खरेदी केली. यामुळे चांगला नफा झाला. पुढील दहा ते पंधरा दिवसांमध्ये भेंडीच्या बाजारभावात वाढण्याची शक्यता आहे.
-विलास औटी शेतकरी, भेंडी उत्पादक

03278