आळेफाटा, ता. ११ : राजुरी (ता. जुन्नर) या ठिकाणी एका शेतकऱ्याच्या शेतात बुधवारी सकाळी ११ वाजण्याच्या सुमारास एक बिबट्या मृतावस्थेत आढळून आल्याची माहिती वन अधिकाऱ्यांनी दिली. याबाबत मिळालेल्या माहितीनुसार, राजुरी येथील हातवळण मळ्यात राहात असलेले मोहन भीमाजी हाडवळे हे आज सकाळी ११च्या सुमारास जनावरांसाठी हत्तीगवत तोडण्यासाठी घराजवळच असलेल्या शेतावर गेले होते. गवतातून उग्र वास येऊ लागल्याने त्यांनी आतमध्ये जाऊन पाहिले असता, त्या ठिकाणी एक बिबट्या मृतावस्थेत आढळून आला. हाडवळे यांनी लगेचच याबाबतची माहिती वन अधिकाऱ्यांना कळवली. त्यानंतर वनअधिकारी लहू ढोकळा, त्रिंबक जगताप, स्वप्नील हाडवळे यांनी घटनास्थळी भेट देऊन पाणी केली. मृत बिबट्याला माणिकडोह येथील निवारा केंद्रात हलवण्यात आले आहे. दरम्यान, मंगळवारी कोळवाडी या गावात शिवाजी बजाबा गाढवे यांच्या शेतात मृत बिबट्या आढळून ला होता. त्यानंतर आज सलग दुसऱ्या दिवशी राजुरी येथे दुसरा मृत बिबट्या आढळून आला असल्याने या परिसरात भितीचे वातावरण निर्माण झाले आहे. वन विभागाने या परिसरात पिंजऱ्यांची संख्या वाढवावी, अशी मागणी माजी सभापती दीपक‌ औटी, उपसरपंच माऊली शेळके यांनी केली आहे.