आळेफाटा, ता.१८ : जुन्नर तालुक्याच्या पूर्व भागातील गावांना दिवसभर थ्री फेज वीज द्यावी, अशी मागणी महावितरणकडे शेतकऱ्यांच्या वतीने वल्लभ शेळके यांनी केली आहे.
राजुरी, बेल्हा, जाधववाडी, बोरी बुद्रुक, साळवाडी, गुंजाळवाडी, आळे, वडगाव आनंद, वडगाव कांदळी, या गावामध्ये सध्या महावितरण कंपनी दिवसा फक्त चारच तासच वीज देत आहे. यामुळे पाणी असूनही ते पिकांना देता येत नाही. यामुळे शेतकरी त्रस्त झाले आहेत. त्यातच परिसर बिबट्या प्रवण क्षेत्रात मोडत आहे. येथे केव्हाही बिबट्या हल्ला करू शकतो, अशी भीती शेतकऱ्यांनी व्यक्त केली आहे. यामुळे महावितरण कंपनीने दररोज दिवसा आठ तास कृषिपंपांना वीज द्यावी, अशी मागणी केली आहे.
दरम्यान राजुरी फिडर ओव्हरलोड असल्यामुळे पूर्ण फिडर चालू केल्यास थ्री फेज लाईन पाच ते दहा मिनिटात बंद होते त्याच्यामुळे आम्ही उंच खडक व पानसरे मळा साइड असे दोन साईडला चार चार तास सप्लाय सोडत असल्याचे महावितरणच्या अधिकाऱ्यांनी सांगितले.