आळेफाटा, ता.१५ : आळेफाटा परिसरातील आळे, राजुरी, उंचखडक (ता.जुन्नर) या गावांच्या एका बाजूला डोंगर आहे. डोंगरावर अज्ञाताने पेटवलेल्या वणव्यामुळे वन्यप्राण्यांचे हाल होत आहेत. वणवा पेटवण्याचे अनेक प्रकार घडत आहेत. पक्ष्यांचाही आगीत होरपळून मृत्यू होत आहे. याकडे वनविभागाने गार्भियाने लक्ष देण्याची मागणी वन्यप्रेमींकडून होत आहे.

आगीमुळे संपूर्ण डोंगरावर असलेले झाडी झुडपे जळून खाक झाली आहेत. तर याचा मोठा फटका या ठिकाणी असलेले मोर, ससा, हरिण, कोल्हा या प्राण्यांना तसेच कावळा चिमणी, पोपट या पक्ष्यांना आगीचा दाह सोसावा लागत आहे. तसेच राजुरी, उंचखडक तसेच आळे गावच्या हद्दीत असलेल्या डोंगरावर गेल्या पंधरा दिवसांपासून दोन ते तीन वेळा अज्ञात व्यक्तीने डोंगरावर जाऊन आग लावली आहे.
दरम्यान, आळेफाटा परिसरातील उंचखडक व आळे या दोन गावांमध्ये जवळपास दोन हजार हेक्टर क्षेत्र हे जंगलांनी व्यापलेले आहे. यामध्ये आळे गावातील कोळवाडी व संतवाडी ही दोन गावे जोडलेली आहेत तर उंचखडक या गावाला आबाटेक ही जोडलेली आहेत विशेष म्हणजे या सर्व गावातील जंगलांच्या एका बाजू संपूर्ण डोंगरांनी व्यापलेला आहे. या जंगलात हरिण, मोर, वाघ, हे मोठ्या प्रमाणावर आहे.