आळेफाटा, ता. ७ : जुन्नर तालुक्यातील कांदा उत्पादक बाजारभाव दिवसेंदिवस कमीच होत असल्याने मेटाकुटीला आले आहेत. कांद्याच्या विक्रीतून उत्पादन खर्चही निघत नसल्यामुळे शेतकरी आर्थिक संकटात सापडले आहे.
जुन्नरच्या पूर्व भागातील गावांमध्ये मोठ्या प्रमाणात कांदा लागवड केली जाते. सध्या कांद्याला प्रतिकिलोस केवळ १० ते १३ रुपये बाजारभाव मिळत आहे. परंतु वातावरणात होणाऱ्या बदलामुळे वारंवार औषध फवारणी करावी लागते. खतांच्या वाढलेल्या भरमसाट किंमती, औषधे, लागवडीपासून काढणीपर्यंत होणारा खर्च, मजुरीचे वाढते दर यामुळे शेतकरी त्रस्त झाला आहे.
दरम्यान, शासनाने निर्यातबंदी उठवून कांदा उत्पादकाला रास्त भाव द्यावा, नाहीतर हमीभाव द्यावा, अशी मागणी शेतकऱ्यांकडून होत आहे.
दरम्यान, जुन्नर कृषी उत्पन्न बाजार समितीच्या आळेफाटा या ठिकाणी मंगळवारी झालेल्या मोढ्यांत एक नंबर कांद्यास दहा किलोस एक नंबर कांद्यास ११० ते १३० बाजारभाव मिळाला‌‌ तर दोन नंबरला ९० ते ११०, तीन नंबरला ७० ते ९०, चिंगळीला ४० ते ८० रुपये बाजारभाव मिळाला आहे.