आळेफाटा, ता. २६ ः आळेफाटा पोलिस ठाणे हद्दीच्या गावांमधील नागरिकांनी स्वतःच्या सुरक्षितेसाठी सीसीटीव्ही कॅमेरे बसवून घ्यावेत, असे आवाहन पोलिस निरीक्षक विश्वास जाधव यांनी केले आहे. जुन्नर तालुक्याच्या पूर्व भागातील गावांच्या सुरक्षिततेच्या दृष्टीने नागरिकांनी कॅमेरे बसवून घेण्यासाठी यामध्ये सर्वांत महत्त्वाची भूमिका ग्रामीण भागातील पतसंस्था, बँका व व्यावसायिकांची राहणार असल्याचे पोलिसांनी स्पष्ट केले असून, पोलिसांच्या उपक्रमाला अनेकांचा सकारात्मक प्रतिसाद मिळत आहे. नागरिकांच्या सुरक्षिततेच्या दृष्टीने या कॅमेऱ्यांचा सर्वाधिक उपयोग होणार असल्याने जास्तीत जास्त कॅमेरे बसवावेत, असे आवाहन आळेफाटा पोलिस ठाण्याचे पोलिस निरीक्षक जाधव यांनी केले आहे. कोणताही गुन्हा घडल्यानंतर आरोपींना शोधण्यासाठी व नंतर शिक्षा होण्यासाठी सीसीटीव्हीत झालेले चित्रण अनेकदा महत्त्वाचा पुरावा म्हणून उपयोगी ठरत असल्याचे अलीकडच्या काही वर्षांत वारंवार सिद्ध झाले आहे. आळेफाटा शहरासह ग्रामीण भागाचा विस्तार मोठा वाढत आहे. कॅमेरे बसविल्यामुळे गेल्या काही महिन्यात गुन्ह्याचा शोध घेण्यात पोलिसांना यश आल्याचे जाधव यांनी सांगितले.