आळेफाटा, ता. ३ : ‘‘नारायणगाव एसटी प्रशासनातर्फे शासनाच्या अहिल्याबाई होळकर मोफत पास योजनेअंतर्गत आळे (ता. जुन्नर) येथील ज्ञानेश्वर ग्रामोन्नती मंडळ संचलित ज्ञानमंदिर कनिष्ठ महाविद्यालयात शिक्षणासाठी बाहेर गावावरून येणाऱ्या सर्व बारावीच्या विद्यार्थिनींसाठी पास विद्यालयातच येऊन देण्यात आले,’’ अशी माहिती नारायणगाव आगार व्यवस्थापक तुकाराम पवळे व शिवाजी वायकर यांनी दिली.
विद्यार्थ्यांचा वेळ एसटी पाससाठी बसस्थानकात वाया जाऊ नये, याकरिता वरिष्ठांनी दिलेल्या आदेशानुसार महाविद्यालयात जाऊन पास व ओळखपत्र देण्याची सुविधा महामंडळाकडून दिल्याचे आळेफाटा वाहतूक निरीक्षक मणियार यांनी सांगितले. तसेच ओतूर-आळेफाटा, म्हस्केवाडी- अळकुटी- बेल्हा- आळेफाटा, पोखरी- पळसपूर- नळवणे फाटा- आणे- बेल्हा- आळेफाटा या तीन मार्गावर महाविद्यालयाच्या वेळेत बस सुरू करण्यात येतील, असे नारायणगाव आगर प्रमुखांनी सांगितले. त्या संदर्भात प्राचार्य व संस्थेने तातडीने पत्रव्यवहार करावा, अशी सूचना करण्यात आली. यावेळी संस्थेचे सचिव डॉ. अर्जुन पाडेकर, प्राचार्य संदीप भवारी, उपप्राचार्य सुरेश कुऱ्हाडे, पर्यवेक्षक जी. सूर्यवंशी, ग्रंथपाल एस. पवार आदी उपस्थित होते.