आळेफाटा, ता. ३ : राजुरी (ता. जुन्नर) येथे सह्याद्री व्हॅली इंजीनियरिंग कॉलेजसमोर बुधवारी (ता. ३) रात्री एसटी बस व पिकअपच्या अपघातात पिकअप चालकाचा मृत्यू झाला. विनायक बाजीनाथ पंडित (वय ३५, रा. सातपूर कॉलनी, नाशिक) असे अपघातात मरण पावलेल्या पिकअप चालकाचे नाव आहे.
कल्याणहून साकोरी येथे मुक्कामी निघालेली एसटी बस (क्र. एमएच २० बीएल ३१०६) ही राजुरी येथे आली असताना आळेफाटा दिशेने जाणाऱ्या बोलेरो पिकअप चालकाचे वाहनावरील नियंत्रण सुटल्याने समोरून आलेल्या एसटी बसला धडकली. त्यात पिकअप चालक गंभीर जखमी झाला. त्यास आळेफाटा येथे खासगी रुग्णालयात उपचारासाठी आणले. मात्र, उपचारादरम्यान त्याचा मृत्यू झाला. एसटीमधील प्रवाशांना कोणतीही दुखापत झाली नाही, अशी माहिती नारायणगाव आगार प्रमुख आरगडे यांनी दिली.