आळेफाटा, ता. १४ : ज्ञानेश्‍वर ग्रामोन्नती मंडळ संचलित आळे (ता. जुन्नर) येथील बाळासाहेब जाधव कला, वाणिज्य व विज्ञान महाविद्यालयात सावित्रीबाई फुले पुणे विद्यापीठ, पुणे गुणवत्ता सुधार योजनांतर्गत ‘महिला सबलीकरण व सक्षमीकरण कार्यशाळा पार पडली.
कार्यशाळेच्या पहिल्या सत्रात ‘महिलांचे आरोग्य’ यावर प्रसिद्ध स्त्रीरोगतज्ज्ञ डॉ. सरस्वती कणसे यांचे व्याख्यान झाले. त्यांनी दैनंदिन आदर्श जीवनशैली व नियमित आरोग्य तपासणीचे महत्त्व अधोरेखित केले. तसेच महिलांनी आहार, झोप, व्यायाम, ताणव्यवस्थापन व सूर्यप्रकाश या आरोग्य पंचसूत्रीचा अवलंब करून आपले आरोग्य उत्तम राखावे असे सांगितले. सत्राच्या अध्यक्षस्थानी विशाखा महिला तक्रार निवारण समितीच्या अध्यक्षा डॉ. अरुणा वाघोले या होत्या. त्यांनी महाविद्यालयात घेतल्या जाणाऱ्या आरोग्यविषयक उपक्रमांची माहिती दिली.
दुसऱ्या सत्रात भारतीय बेसबॉल संघाच्या कर्णधार रेश्मा पुणेकर यांच्याशी प्रा. सरीता आबक यांनी संवाद साधला. या संवादात पुणेकर यांनी शालेय जीवनापासून ते एक यशस्वी बेसबॉलपटू होण्यापर्यंतचा संघर्षमय प्रवास विद्यार्थिनींसमोर उलगडला. त्यासाठी प्रामाणिकपणा, रोजचा व्यायाम, सातत्य आणि संयम यांचा अवलंब केल्याचे पुणेकर यांनी सांगितले. तसेच या यशामध्ये पालक आणि समाजाचाही सहभाग असल्याचे त्यांनी नमूद केले. तसेच जागतिक स्तरावर बेसबॉल खेळताना आलेले अनुभव त्यांनी विद्यार्थिनींना सांगितले. ग्रामीण भागातील विद्यार्थिनींमध्येही विविध क्षेत्रांमध्ये यशस्वी होण्याची क्षमता आहे. त्या आपल्या पालकांचे व शिक्षकांचे मार्गदर्शन घेऊन निश्‍चितच यशस्वी जीवन घडवू शकतात, असा आशावाद पुणेकर यांनी व्यक्त केला.
दुसऱ्या सत्राच्या अध्यक्षस्थानी ॲड. रत्ना हांडे होत्या. त्यांनी अध्यक्षीय भाषणात ‘स्त्रीविषयक कायदे’ यावर मार्गदर्शन केले. यावेळी मंडळाचे अध्यक्ष अजय कुऱ्हाडे, बाळासाहेब जाधव, उपाध्यक्ष सौरभ डोके, मानद सचिव डॉ. अर्जुन पाडेकर, खजिनदार अरुण हुलवळे, संचालक किशोर कुऱ्हाडे, भाऊ कुऱ्हाडे, बबन सहाणे, उल्हास सहाणे, बाबू कुऱ्हाडे, शिवाजी गुंजाळ, जीवनशेठ शिंदे, दिनेश सहाणे, कैलास शेळके, प्रदिप गुंजाळ, देविदास पाडेकर, सम्राट कुऱ्हाडे, रमेश कुऱ्हाडे, शांताराम कुऱ्हाडे आदींसह महिला शिक्षिका उपस्थित होत्या.
कार्यक्रमाचे आयोजन प्राचार्य डॉ. प्रवीण जाधव व ज्ञानमंदिर हायस्कूल व कनिष्ठ महाविद्यालयाचे प्राचार्य संदीप भवारी यांच्या मार्गदर्शनाखाली सर्व महिला शिक्षिका, विशाखा महिला तक्रार निवारण समितीचे सर्व पदाधिकाऱ्यांनी केले. यासाठी वैशाली भुजबळ यांचे विशेष सहकार्य लाभले. प्रा. अर्चना भारती व प्रा. डॉ. एस. एस. रहांगडाले व डॉ. प्रमिला काकडे यांनी प्रास्ताविक केले. प्रा. दीक्षा खर्डे व प्रा.स्मिता कुऱ्हाडे यांनी सूत्रसंचालन केले. प्रा. प्रियांका भुजबळ यांनी आभार मानले.