आळेफाटा, ता. २० : पुणे-नाशिक महामार्गावरील आळे गावच्या हद्दीतून गेलेल्या पिंपळगाव जोगा कालव्याच्या कडेला साचलेला कचरा आळे ग्रामपंचायतीने उचलला असून नागरिकांनी आणि ग्रामस्थांनी ‘सकाळ’चे आणि ग्रामपंचायतीच्या पदाधिकाऱ्यांचे आभार मानले.
पुणे-नाशिक राष्ट्रीय महामार्गावर असलेल्या आळे गावच्या हद्दीतून गेलेल्या पिंपळगाव जोगा कालव्याच्या कडेला मोठ्या प्रमाणात साचत असल्याचे वृत्त ‘सकाळ’मध्ये प्रसिद्ध करण्यात आले. त्याची दखल घेत येथील कचरा उचलण्यात आला आहे. यासाठी गावचे माजी सरपंच, कृषी उत्पन्न बाजार समितीचे उपसभापती प्रीतम काळे, सरपंच सखाराम भंडलकर, उपसरपंच मंगेश कुऱ्हाडे, माजी उपसरपंच ॲड. विजय कुऱ्हाडे यांनी प्रयत्न केले आहेत.
आळे, आळेफाटा परिसरात मोठ्या प्रमाणावर उद्योग, व्यवसाय वाढत असल्याने या ठिकाणी सर्व कचरा संकलन करून कचरा प्रकल्प कार्यान्वित होत आहे. परंतु काही दिवसांपासून कालव्याच्या कडेला तसेच आळेखिंड येथे सतत ये-जा करणारी वाहने, हॉटेल चालक, हॉस्पिटल स्टाफ, भंगार दुकानदार सातत्यानं कचरा रस्त्याच्या कडेला टाकत असल्याने दुर्गंधी पसरली होती. ‘सकाळ’ने बातमी प्रसिद्ध केल्यानंतर गावचे सरपंच, उपसरपंच गस्त घालून कचरा टाकणाऱ्यांचा शोध घेत होते. कचरा टाकणाऱ्यांना अडवून समज देत या ठिकाणी कचरा टाकू नका असे सांगून त्यानंतर जेसीबीच्या सहाय्याने कचरा उचलण्यात आला आहे.

आळे ग्रामपंचायतीच्या वतीने पिंपळगाव जोगा कालव्याच्या कडेला साचलेला कचरा उचलण्यात आला असून यापुढे या ठिकाणी जो कोणी कचरा टाकेल त्यांच्यावर कडक कारवाई करण्यात येणार आहे. यासाठी या ठिकाणी सीसीटीव्ही लावण्यात आले आहेत.
मुकुंद भंडलकर, सरपंच