आळेफाटा, ता.२१ : आळेफाटा येथील गाईंच्या बाजारात १९१ गाईंची विक्री झाली. यामुळे ४० लाख रुपयांची उलाढाल झाल्याची माहिती बाजार समितीचे सभापती संजय काळे, उपसभापती प्रीतम काळे, सचीव रूपेश कवडे व आळेफाटा येथील कार्यालय प्रमुख दीपक म्हस्करे यांनी दिली.
आळेफाटा येथील गाईंच्या बाजारात पुणे, नाशिक, संगमनेर, अहिल्यानगर, शिरूर, आंबेगाव, ठाणे तसेच इतर ठिकाणांहून संकरित दुधाळ जातीच्या गाया विक्री साठी येत असतात. या आठवड्यात भरलेल्या बाजारात २०० संकरित गाया विक्रीसाठी आल्या होत्या. यामध्ये पाच हजारांपासून ७० हजार ५०० रुपयांपर्यंत गाई विकल्या गेल्या आहेत.
दरम्यान गेल्या आठवड्यात दुधाला एका लिटर मागे एक रुपया वाढल्याने गाईंच्या किमतीत वाढ झालेली असली तरी आज बाजारात गाई विक्रीसाठी कमी आलेल्या होत्या तसेच गाईंच्या किमतीत वाढ झाली असल्याची माहिती तान्हाजी कुऱ्हाडे, शानू बेपारी, हबीबुल सौदागर या व्यापाऱ्यांनी सांगितले.