आळेफाटा, ता. २७ : वाढती पाणीटंचाई आणि सोशल मीडियाच्या प्रभावामुळे पारंपरिक बहुरूपी कला जोपासणाऱ्या समाजावर आर्थिक संकट ओढवले आहे. गावोगाव भटकंती करूनही पुरेशी देणगी मिळत नसल्याने या कलाकारांचा उदरनिर्वाह कठीण झाला असल्याचे चित्र आळेफाटा (ता. जुन्नर) परिसरात पाहावयास मिळत आहे.
छत्रपती शिवाजी महाराजांच्या काळापासून गुप्तहेर आणि मनोरंजनाची धुरा जोपासणारा हा समाज आजही आपली परंपरा टिकवून आहे. घोडेगाव (ता. आंबेगाव) येथील युवा बहुरूपी बबन शेगर हा तरुण आपले पहिलीपर्यंतचे शिक्षण सोडून वडिलांच्या आजारपणामुळे ही कला जोपासत आहे. डॉक्टर, वकील, हवालदार अशा विविध भूमिकांतून तो लोकांचे मनोरंजन करतो. मात्र, सध्याच्या दुष्काळी परिस्थितीमुळे नागरिक देणगी आणि धान्य देताना हात आखडता घेत आहेत.
‘‘शासनाकडून कोणतेही मानधन मिळत नाही. मुलांच्या शिक्षणासाठी आणि नोकरीसाठी मदत मिळाल्यास ही भटकंती थांबेल,’’ अशी खंत बबन शेगर यांनी व्यक्त केली. टीव्ही आणि सोशल मीडियामुळे या कलेचा प्रभाव कमी होत असून, शासनाने या लोककलेकडे लक्ष देण्याची गरज निर्माण झाली आहे.

07956