बेल्हे, ता. ६ : जुन्नर तालुक्यातील ग्रामपंचायत सदस्य, सरपंच, उपसरपंच यांच्यासाठी राष्ट्रीय ग्राम स्वराज अभियान अंतर्गत ८ जानेवारी ते १० जानेवारी व ता. ११ ते १३ जानेवारी दरम्यान दोन ठिकाणी विभागानुसार प्रशिक्षण वर्ग कार्यक्रमाचे आयोजन केले आहे. दरम्यान याबाबतची मागणी जुन्नर तालुका राष्ट्रवादी काँग्रेसचे अध्यक्ष पांडुरंग पवार यांनी, यापूर्वीच पंचायत राज पुणेचे संचालक आनंद भंडारी यांच्याकडे पत्राद्वारे केली होती.

याबाबत पांडुरंग पवार यांच्या पाठपुराव्याला यश आले आहे. दरम्यान जिल्हा परिषदेच्या ग्रामपंचायत विभागाचे उपमुख्य कार्यकारी अधिकारी यांना राज्य सरकारच्या ग्रामपंचायत विभागाने पत्राद्वारे राष्ट्रीय ग्राम स्वराज अभियान सन २०२३-२४ अंतर्गत पंचायत राज प्रशिक्षण केंद्र, सातारा या कार्यालयास जुन्नर पंचायत समितीकडून २७८ सरपंच सदस्यांची यादी प्राप्त झाली आहे.

त्यानुसार ता. ८ ते १० जानेवारी २०२४ दरम्यान जुन्नर तालुक्यातील सांगणोरे, आंबेगव्हाण, डुंबरवाडी, नारायणगाव, निमगिरी, खटकाळे, राळेगण, धालेवाडी तर्फे मिन्हेर, खामगाव, सुकाळवेढे, पाडळी, बुचकेवाडी, पारुंडे, उंब्रज नं. १, पांगरी तर्फे मढ, वाणेवाडी या ग्रामपंचायतींच्या सरपंच, उपसरपंच, सदस्य या एकूण १५१ सदस्यांसाठी आदिवासी विकास प्रबोधन जुन्नर येथे प्रशिक्षण कार्यक्रम होणार आहे. तर ११ ते १३ जानेवारी २०२४ दरम्यान राजुरी ग्रामपंचायत सभागृहात पिंपळवंडी, कांदळी, वडगाव आनंद, बांगरवाडी, रानमळा, शिरोली तर्फे आळे, गुंजाळवाडी (बेल्हे), गुळुंचवाडी, बेल्हे, पिंपरी कावळ, तांबेवाडी या ग्रामपंचायतींच्या एकूण १२७ सदस्यांसाठी प्रशिक्षण कार्यक्रम होणार असल्याचे जिल्हा परिषद सदस्य पांडुरंग पवार यांनी सांगितले.