बेल्हे, ता. १४ : बेल्हे (ता. जुन्नर) येथील समर्थ शैक्षणिक संकुलातील समर्थ औद्योगिक प्रशिक्षण संस्था (आयटीआय) मधील विविध ट्रेड्समधील ६३ विद्यार्थ्यांची, नुकतीच चाकणच्या बजाज ऑटो लि. या कंपनीमध्ये औद्योगिक प्रशिक्षणाच्या अभ्यासक्रमाचा भाग म्हणून ‘ऑन जॉब ट्रेनिंग’ (OJT) साठी निवड झाली आहे.
  बेल्हे येथील समर्थ औद्योगिक प्रशिक्षण संस्थेचे उपप्राचार्य विष्णू मापारी यांनी ही माहिती दिली. या निवडीमुळे विद्यार्थ्यांना प्रत्यक्ष उद्योगातील कामाचा अनुभव मिळणार असून त्यांच्या कौशल्यविकासाला मोठी चालना मिळणार आहे. औद्योगिक प्रशिक्षणाच्या अभ्यासक्रमाचा भाग म्हणून राबविण्यात येणाऱ्या ऑन जॉब ट्रेनिंगमुळे विद्यार्थ्यांना आधुनिक यंत्रसामग्री, उत्पादन प्रक्रिया, सुरक्षितता, नियम, कार्यसंस्कृती यांचा प्रत्यक्ष अनुभव घेता येणार आहे. प्रशिक्षण पूर्ण झाल्यानंतर रोजगाराच्या संधी अधिक व्यापक होणार असल्याचे मत प्राचार्य पांडुरंग हाडवळे यांनी व्यक्त केले.
विद्यार्थ्यांनी शिस्त व कौशल्य आत्मसात करून उद्योगविश्‍वात संस्थेचे नाव उज्वल करावे असे आवाहन संस्थेचे विश्‍वस्त वल्लभ शेळके यांनी व्यक्त केले. चाकणच्या बजाज ऑटो लि. यांच्या वतीने गणेश जाधव, प्रशांत मगर, प्रथमेश देसाई, गणेश खुटवळ यांनी संबंधित प्रशिक्षणार्थींची निवड केली. संस्थेच्या वतीने संबंधित प्रशिक्षणार्थी विद्यार्थ्यांचे अभिनंदन करण्यात आले.