बेल्हे, ता. २७ : बेल्हे (ता. जुन्नर) येथील श्री बेल्हेश्वर विद्यालयाचे चार विद्यार्थी राष्ट्रीय आर्थिक दुर्बल घटक शिष्यवृत्ती परीक्षेत (एनएमएमएस) पात्र ठरले आहेत. या यशस्वी विद्यार्थ्यांना पुढील चार वर्षे प्रतिवर्षी १२ हजार रुपयांची शिष्यवृत्ती मिळणार असल्याची माहिती प्राचार्य राजेंद्र पडवळ यांनी दिली. महाराष्ट्र राज्य परीक्षा परिषदेमार्फत डिसेंबर २०२५मध्ये ही परीक्षा घेण्यात आली होती. विद्यालयातील एकूण ४९ विद्यार्थ्यांपैकी ३३ विद्यार्थी उत्तीर्ण झाले, तर चार विद्यार्थी शिष्यवृत्तीसाठी निवडले गेले. यामध्ये कल्पेश विनायक पिंगट (१४५ गुण), गौरी निवृत्ती देवकर (१३० गुण), राया दीपक शेळके (१२६ गुण) आणि सार्थकी चंद्रकांत शिंदे (११६ गुण) यांचा समावेश आहे. या विद्यार्थ्यांना विभाग प्रमुख पांडुरंग पोटे, मार्गदर्शक शिक्षक नितीन मुळूक, शीतल कळंत्रे, सीमा सुपेकर, सुरेश साबळे आणि मंगेश नाडेकर यांचे मार्गदर्शन लाभले.