पारगाव, ता. १७ : आंबेगाव तालुक्याच्या पूर्व भागात ४५ लोकांनी अनधिकृतपणे चोरून वीज वापरली. यामुळे त्यांच्यावर कायदेशीर कारवाई व्हावी म्हणून संबंधित व्यक्तींच्या विरुद्ध महावितरण कंपनी निरगुडसर कार्यालयाच्या वतीने पारगाव कारखाना पोलिस ठाणे येथे तक्रार अर्ज दाखल केला आहे.
महावितरण कंपनीने जेवढे वीजबिल संबंधितांना आकारलेले आहे तेवढे वीजबिल त्यांनी भरावे. सदर बिल भरल्याची पावती पोलिस ठाण्यात आणून दाखवावी, अन्यथा वारंवार सांगून देखील वीजबिल भरणार नाहीत, अशा व्यक्तींच्या विरोधात वीज चोरीचे गुन्हे दाखल करून पुढील कायदेशीर कारवाई करण्यात येईल. अशी माहिती सहायक पोलिस निरीक्षक लहूजी थाटे यांनी दिली आहे.
दरम्यान, ज्या लोकांना सांगून देखील ते वीजबिल भरले नाहीत त्यांच्यावर आता गुन्हे दाखल करण्यास सुरुवात केली आहे. अशा प्रकारचे दोन गुन्हे दाखल केले आहेत. राहिलेल्या लोकांनी वीजबिल भरावे. अन्यथा त्यांच्यावर देखील गुन्हे दाखल करून पुढील कायदेशीर कारवाई करण्यात येईल. संबंधित लोकांनी बिल भरून प्रशासनास सहकार्य करावे, असे आवाहन थाटे यांनी केले आहे.